Академия
жаңалықтары

Құрметті әріптестер!

Біз 2024 жылға арналған «Қазақстанның өңірлері: сын-қатерлері мен шешу жолдары» атты Жас сарапшыларды қолдау бағдарламасының басталғанын қуанышпен хабарлаймыз. Бағдарламаны «Қазақстан Республикасының Президенті жанындағы Қазақстанның стратегиялық зерттеулер институты» РММ (бұдан әрі – ҚСЗИ) жүзеге асырады және отандық жас сарапшылардың талдау және зерттеу саласындағы бәсекеге қабілеттілігін дамыта отырып, әлеуметтік ғылымдар саласында зерттеулер жүргізуіне қолдау көрсетуге бағытталған.

Бағдарламаның мақсаты – сарапшылар қауымдастығын жаңа мамандармен және инновациялық идеялармен толықтыру үшін дарынды жас сарапшыларды қолдау.

Бағдарламаның міндеттеріне жас сарапшыларды іріктеу, олардың ғылыми-зерттеу дағдыларын жетілдіру арқылы біліктілігін арттыру, елдің әлеуметтік-экономикалық және қоғамдық-саяси дамуы үшін практикалық қызығушылық тудыратын ғылыми жобаларды іске асыруға әдістемелік қолдау көрсету, сондай-ақ жастар арасында сараптама-талдау қызметін кеңінен насихаттау кіреді.

Қатысушыларға қойылатын талаптар. Бағдарламаға қатысушыларды іріктеу конкурстық негізде жүзеге асырылады. Бағдарламаға қатысу үшін үміткер келесі талаптарға сай болуы керек:

– Бағдарламаға қатысуға өтініш берген кезде жасы 40 (қырықтан) аспаған Қазақстан Республикасының азаматы болуы;

– Eліміздің облыстарының бірінде тұруы (Астана және Алматы қалалары есептелінбейді);

– гуманитарлық немесе әлеуметтік ғылымдар саласы бойынша кемінде магистр дәрежесі және кемінде 3 жыл жұмыс өтілі болуы;

– ғылыми басылымдарда жарияланымдары және БАҚ-та талдамалық материалдары болуы.

Финалистерді іріктеу

– Үйлестіруші Бағдарламаға қатысушылардың жеке талдамалық есептерін Конкурстық комиссияның қарауына жібереді. Байқау комиссиясы ұсынылған талдамалық есептерді 5 жұмыс күні ішінде бағалайды және жай дауыс беру арқылы Финалистерді анықтайды.

– Байқау комиссиясының шешімі негізінде 3 жұмыс күні ішінде Финалистпен жеке талдамалық есепті әзірлеу бойынша қызмет көрсетуге шарт жасалады. Гонорар сомасы салық төлемдерін есепке алғанда 500 000 (бес жүз мың) теңгені құрайды.

– Конкурстық комиссияның шешімімен Бағдарламаның финалистері 1 жыл мерзімге ҚСЗИ кадрлық резервіне енгізуге ұсынылады.

            Бағдарламаның өткізілу кезеңі

Бағдарламаға қатысуға берілетін Өтінім ҚСЗИ хабарландыруында көрсетілген Байқауға қатысуға өтінімдерді қабылдау мерзімі ішінде ұсынылуы тиіс. Өтінім келесі құжаттарды қамтиды:

– осы Ереженің №2 қосымшасына сәйкес толтырылған өтініш нысаны (pdf форматындағы қол қойылған скан-көшірмесі және Word-ғы электронды нұсқасы);

– осы Ереженің №3 қосымшасына сәйкес уәждемелік эссе (pdf форматындағы қол қойылған скан-көшірмесі және Word-ғы электронды нұсқасы);

– осы Ереженің №4 қосымшасына сәйкес зерттеу тақырыбының негіздемесі (proposal) (pdf форматындағы қол қойылған скан-көшірмесі және Word-ғы электронды нұсқасы);

– үміткердің жеке басын куәландыратын құжаттың скан-көшірмесі;

– магистратураны бітіргені туралы дипломның, философия докторы (PhD)/ профилі бойынша доктор/ ғылым кандидаты/ ғылым докторы (ғылыми дәрежелер бар болса) бітіргені туралы дипломның скан-көшірмесі.

– еңбек кітапшасының немесе еңбек өтілін растайтын өзге де құжаттардың скан-көшірмелері;

– ғылыми еңбектерінің тізімі, мақалалардың скан-көшірмесін немесе жарияланымдарға белсенді сілтемені қосымша жолдау міндетті.

Келесі жағдайларда ҚСЗИ себептерін көрсетпей Өтінімді қараудан бас тартуға құқылы:

– өтінімді хабарламада көрсетілген мерзімнен кеш ұсыну;

– үміткердің құжаттардың толық топтамасын ұсынбауы, Өтінімде толтырылмаған тармақтардың болуы және/немесе Өтінімнің/Үміткердің осы Ереженің талаптарына сәйкес келмеуі;

– құжаттардағы дәйексіз деректердің анықталуы;

– ҚСЗИ үшін беделдік нұқсан келтіретін мәліметтердің анықталуы;

– құжаттардың скан-көшірмелерінің сапасының төмендігі;

– уәждемелік эссе мен зерттеу тақырыбының негіздемесіндегі жалпы сөздер саны бойынша талаптардың сақталмауы.

Байқауға қатысу тегін. Үміткер бір ғана Өтінім беруге құқылы. Үміткер ҚСЗИ-ға өтінім бергеннен кейін Өтінімнің осы Ереженің талаптарына сәйкессіздіктерін жою мақсатында Өтінімге өзгерістер енгізуге құқығы жоқ. Өтінімді қарау Үміткердің жазбаша өтініші бойынша ҚСЗИ тарапынан тоқтатылуы мүмкін.

Бағдарлама туралы толық ақпарат, оның ішінде Бағдарлама ережелері, өтінімдер және іске асыру мерзімдері ҚМСИ-нің www.kisi.kz ресми сайтында орналастырылған. Сұрақтарыңыз болса granty.kisi2024@gmail.com электрондық поштасына жіберіңіз.

«ҚАЗАҚСТАННЫҢ ӨҢІРЛЕРІ: СЫН-ҚАТЕРЛЕРІ МЕН ШЕШУ ЖОЛДАРЫ»

2024 жылға арналған Жас сарапшыларды қолдау бағдарламасының

зерттеу бағыттары

Ішкі саясат:

1. Өңірлерді басқарудағы орталықсыздандыру мәселелері.
2. Азаматтардың жергілікті өзін-өзі басқару процестеріне қатысуы: проблемалары мен болашағы.
3. Жергілікті сайлаудың ерекшеліктері: ауылдық және округ әкімдерін сайлау.
4. Жергілікті өзін-өзі басқарудағы мәслихаттар: тәжірибесі мен болашағы.
5. Өңір күн тәртібіндегі аймақтық көшбасшылар.
6. Өңірлердегі әкімшілік-аумақтық реформаның болашағы.
7. Облыстағы саяси партиялардың жұмысы.
8. Өңірлерді дамытудағы аймақтық элита факторы.
9. Қазақстан Республикасы Президентінің Қазақстан халқына Жолдауын дайындаудағы жаңа тәсілдер.
10. Цифрлық дәуірдегі азаматтық белсенділік: әлеуметтік желілер мен онлайн платформалардың рөлі.
11. Өңірлік бұқаралық ақпарат құралдарының рөлі мен болашағы.

Әлеуметтік саясат:

1. Әлеуметтік қолдау бағдарламаларының тиімділігі.
2. Өңірлердегі демографиялық саясаттың мәселелері.
3. Өңірлердегі білім беру (мектепке дейінгі, орта, жоғары).
4. Өңірлердегі денсаулық сақтау және міндетті медициналық сақтандыру.
5. Өңірлердегі қыздар мен әйелдердің фертильділік ұстанымдары.
6. Байлар – өңірлердегі әлеуметтік тап ретінде.
7. Өлкетану мұражайлары ұлттық бірегейлікті қалыптастыру құралы ретінде.
8. Өңірлер тұрғысындағы білім берудегі теңсіздік мәселелері.
9. Цифрлық дәуірдегі азаматтық белсенділік: әлеуметтік желілер мен онлайн платформалардың рөлі.
10. Міндетті медициналық сақтандыру шеңберіндегі медициналық қызметтердің негізгі міндеттері мен қолжетімділігі.

Экономика:

1. Жергілікті бюджеттердің салық түсімдерін жоспарлау: проблемалары мен болашағы.
2. Өңірдегі кеңістіктік дамуын басқару: халықаралық тәжірибені талдау.
3. Өңірлердің бюджеттік дербестігін арттыру құралдары.
4. Жаңа экономикалық курс жағдайында Қазақстан Республикасының өңірлерінде шағын және орта бизнесті дамытудың әлеуеті.

Халықаралық ынтымақтастық:

1. Қазақстан мен Ресей өңірлерінің шекаралық ынтымақтастығы: Қазақстан көзқарасы/немесе ресейлік тараптың көзқарастары/немесе мүмкіндіктер мен міндеттер.
2. Ресей мен Қазақстанның өңіраралық ынтымақтастығы: тәжірибе, проблемалар, перспективалар.
3. Каспий маңы елдерінің шекаралық ынтымақтастығы.
4. Трансшекаралық өзендерді пайдалану мәселелері.

     Мемлекеттік қызметшілердің қызметін ақпараттық-имидждік сүйемелдеу және мемлекеттік қызметшінің оң келбетін қалыптастыру бойынша 2023-2025 жылдарға арналған іс-шаралар жоспарын орындау аясында       Қазақстан Республикасы Президентінің жанындағы Мемлекеттік басқару академиясының Ақтөбе облысы филиалы  жанынан Мемлекеттік қызметте адам ресурстарын дамыту орталығы  ашылып, өз жұмысын бастады.

     Орталықтың жұмысы пікір алмасу алаңы форматында өткізіледі және онда мемлекеттік қызмет саласындағы заңнаманың новеллалары туралы ақпараттар, оның ішінде ауқымды түсіндіруді талап ететін сұрақтарға жауаптар ұсынылады, іріктеу рәсімдерін, мемлекеттік қызметті өткеру, тоқтату және тәртіптік практика бағыттары бойынша талдау нәтижелері шығарылады.

     Шараға Қазақстан Республикасы Мемлекеттік қызмет істері агенттігінің Ақтөбе облысы бойынша департаментінің басшысы Медет Т.Б, Қазақстан Республикасы Президентінің жанындағы Мемлекеттік басқару Академиясының Ақтөбе  облысы бойынша филиалының директоры Садуакасова С.А, мемлекеттік органдардың персоналды басқару қызметтерінің  өкілдері, «Үздік мемлекеттік қызметшілер» байқауының қатысушылары,  қайта даярлау курсының тыңдаушылары қатысты.

     Өңірдегі мемлекеттік қызметте адам ресурстарын дамыту орталығының  тұсауы – «Үздік практика» жобасымен кесілді.

     Жобаның мақсаты өз қызметінде озық тәжірибе енгізген,  пайдалана отырып ерекше нәтижеге қол жеткізген  талантты мемлекеттік қызметшілерді дәріптеу және олардың тәжірибесін тарату.

     Мемлекеттік қызметшілер күні қарсаңында  «Үздік практика» жобасының  аясында    мемлекеттік қызметшілердің мемлекеттік тілге деген қызығушылығы мен сұранысын арттырып, мемлекеттік тілді еркін меңгерген ересек тұлғалар арасында  мақтаныш сезімін қалыптастыру мақсатында «Söile & SAY» қазақша сөйлесу клубын ашқан     Ақтөбе облысының тілдерді дамыту басқармасының бас маманы Мырза Малика Серікқызы, компьютерлік техникаларға тәуелділік айрықша артқан тұста мемлекеттік қызметшілердің  кітап оқуға қызығушылығын арттыруды көздейтін «Кітаптайм» жобасын қолға алған Байғанин аудандық ішкі саясат бөлімінің бас маманы Рита Халыққызы, Мемлекеттік бағдарламалардың ауылдық жерлерде жүзеге асырылуын халыққа жеткізу,  ауыл әкімдерінің еңбектерін дәріптеу мақсатында «Ауыл әкімінің бір күні»  жобасын жүзеге асырып жүрген Қобда аудандық ішкі саясат  бөлімінің басшысы А.Кабылов өз тәжірибесімен бөлісті.

     Орталық отырысы мемлекеттік қызметшілердің әлеуметтік кепілдіктерінің, оның ішінде еңбек демалысын беру мен іссапарға жіберу мерзімдерінің және төлемдерінің төленуінің сақталуына жасалған талдау қорытындысымен таныстырумен жалғасты.

     Шара республикалық және өңірлік байқаулардың жүлдегерлері мен қатысушыларын марапаттауымен қорытындыланды.

          2023 жылдың 27 – 31 наурыз наурыз аралығында Қазақстан Республикасы Президентінің жанындағы Мемлекеттік басқару академиясының Ақтөбе облысы бойынша филиалында  Ақтөбе облысы әкімдігі, Жобалық кеңсенің бастамасымен, Білім басқармасы, білім саласындағы кәсіподақ ұйымдарының қолдауымен «Жобалық менеджмент – мектепте» жобасы іске асырылды.

          Жоба аясында  Ақтөбе қаласының №28 орта мектебі, Мұғалжар ауданы Қандыағаш қаласындағы № 3 мектеп-гимназия, Ақкемер орта мектебі ұстаздары мен жоғары сынып оқушылары, барлығы 60 адам 40 академиялық сағат көлемінде жобаны басқарудың халықаралық тәжірибесімен танысып, Жобалық менеджмент: ҚР СТ ISO 21500-2014  стандарты бойынша теориялық білім алып,  практикалық дағдыларын қалыптастыруда. 

          Ақтөбе облысы бойынша Жобалық кеңсе басшылығының  Тимур Джунельбаев  қолдауымен  Ақтөбе облысының білім басқармасы, «Қазақстан Республикасы Ақтөбе облыстық білім беру және ғылым қызметкерлерінің кәсіподағы» қоғамдық бірлестігі, Ақтөбе қалалық білім бөлімі, «Ақтөбе облысы және Ақтөбе қаласы білім беру қызметкерлерінің жергілікті кәсіподағы» қоғамдық бірлестіктерімен Филиал арасында қосымша кәсіптік білім және біліктілік арттыру жөніндегі өзара ынтымақтастық туралы үш жақты Меморандум жасалды.

          Мақсат – жобалық басқару технологияларын меңгеру арқылы жалпы білім беру мекемелері қызметкерлерінің жұмыс тиімділігін арттыру, оқушылардың бойында жобалық басқару дағдыларын қалыптастыруға ықпал ету.

          Үш жақты меморандум аясында Филиал тарапынан алдағы уақытта «Жобалық менеджмент» ҚР СТ ISO 21500-2014 ұлттық стандарты бойынша оқыту семинарлары ұйымдастырылатын болады.

Жыл бойы Филиал қабырғасында мемлекет және қоғам қайраткерлері, өз саласының шеберлері, кәсіби мамандар, мемлекеттік қызмет саласының үздіктерімен кездесулер, мотивациялық сұхбаттар өткізіліп келеді.

Бүгін де «Идеялар фабрикасы» форматында мемлекеттік басқару саласындағы зор тәжірибесі бар мемлекеттік қызметшілер, еңбек жолын енді бастаған қызметшілер және бүгінгі студент – ертеңгі маман АҚТӨБЕ ОБЛЫСЫНЫҢ ӘКІМІ ЕРАЛЫ ЛҰҚПАНҰЛЫ ТОҒЖАНОВПЕН кездесті.

Кездесу барысында өңір басшысы мемлекеттік қызмет саласындағы көшбасшы ретінде көп жылғы тәжірибесімен жас басшылармен, еңбек жолын жаңа бастап жатқан мемлекеттік қызметшілермен бөлісті.

Мемлекеттік қызметшілер, «Мансап» мемлекеттік қызметіне қабылданған Филиалдағы «Болашақ басқарушылар» жобасының қатысушылары әлеуметтік-экономикалық маңызы бар идеяларын ортаға салды.

Кездесу соңында Ералы Тоғжанов қызметтік міндеттерін үлгілі атқарып жүрген жас мемлекеттік қызметшілерге Алғыс хаттар табыстады.